سحرته ليتزوجني!!

دكتورة أنا مخنوقة وعاوزة أحكى لحضرتك مشكلتى لكن أرجوكِ متخديش عنى فكرة وحشة أو تستهينى بكلامي.. كنت في البداية بعد ما خلصت دراسة بمعهد سنتين باشتغل في مكتبة كبيرة وكانت صاحبة المكتبة بتعزنى وتعتمد عليا في كل حاجة تقريبا، وأنا كنت معجبة بأخوها الصغير والوحيد، لكن هو كان بيحب بنت زميلته في الجامعة وكانت حلوة وشايفة نفسها شوية، فأخته لم تكن مرتاحة لها ولا تحبها، وحاولت تبعده عنها فرفض، وخطبها بعد ما اتخرج واشتغل، وبدأ يجهز شقته، لكن أخته كل شوية كانت تدعي ربنا ما يتزوجهاش، وكانت بتتمنى يتزوجنى أنا بدالها..

وفي يوم اتفقت معايا أنى أساعدها نعمل لأخيها عمل (سحر) علشان يترك خطيبته ويتزوجني أنا، لأن في واحد كان بيعمل العملات ديه وطلب منها حاجات أنا أعملها، علشان يفكر يتزوجنى وأخته كمان طلبت منى أصاحب خطيبة أخوها وأدخل بيتها أجيب حاجة تخصها، وفعلا وافقتها وساعدتها، وبعد شهر أخوها فسخ خطوبته وتزوجنى من 4 سنين تقريبًا، وربنا رزقنا ببنت عمرها سنة..

المشكلة أنه من وقت ما خطبني وهو لا بيضحك ولا حتى بيبتسم، وحتى في فرحنا كأنه مغصوب على الجوازة، مهما أعمله يا دكتورة علشان أسعده مش بيتجاوب معايا، حتى بنته بيشيلها ويلاعبها كل فترة طويلة، وفي يوم قابلنا خطيبته الأولى في المول ورغم إنها مخدتش بالها مننا إلا أن زوجى ارتبك وكأنه كان نفسه يكلمها، وظل أسبوع تقريبا حاله متغير، ولا بيخرج ولا بيروح الشغل ولا بياكل حتى، وبعدها أخد هدومه وذهب عند أخته من شهر تقريباً لأنها لم تتزوج وعايشة بمفردها رغم كبر سنها، ولا يرد على رناتى، ورغم أنى عمري ما زعلته، لكن أخته كل ما اتصل بها تقولى أنتِ طفشتيه وأنتِ السبب ده شكله اتغير وخس، وبتعاملنى بجفاء..

أنا محتارة ومخنوقة ومش عارفة أعمل إيه وخايفة مووووت أخته تعملى سحر علشان يطلقنى، وعاوزة أروح للشيخ إللى عملنا السحر قبل كده علشان أرجع زوجى لكن خايفة الشيخ يقول لأخته والمشكلة تزيد، أرجوكِ انصحيني، لكن بدون إهانة لمشاعري أو تعنيف من حضرتك أو القراء لأن كل إللى حصل كان غصب عنى، أنا خايفة على بنتى وصعبانة عليا.