شبكة رمضان الإخبارية شبكة إخبارية تهتم بشئون الجالية العربية فى النمسا ودول الجوار
نانسى أعجبت بخدودى وسألت تامر: «هو إنت مركب رموش؟
اتشتمت عشان ما انضمتش لفريق كاظم رغم إن هو نفسه مزعلش
كانت على بعد خطوة وحيدة من الحصول على لقب «ذا فويس كيدز» بعد أن تأهلت للمرحلة النهائية والعرض المباشر الأخير بعدما اجتازت كل المراحل وكل التصفيات، ولكن ذهب اللقب للطفل المغربى حمزة لبيض، بينما سرقت هى قلوب ملايين المشاهدين فى مصر والوطن العربى، تشاجر كاظم الساهر وتامر حسنى ونانسى عجرم لكى تنضم لفريق كل منهم، وعلى أبواب مطار القاهرة كان جمهورها فى استقبالها.. أشرقت أحمد، نجمة العشر سنوات فى أول حوار لها بعد عودتها من لبنان.
■ مين كان أقرب حد ليكِ هناك من المتسابقين؟
– نور وماريا.. ورغم أنهم من العراق واليمن بس كانوا بيفهمونى وبفهمهم ووحشونى جدًا رغم إنى سبتهم بقالى يومين بس.
■ مين غيرك هناك حسيتى إن صوته يبقى فويس كيدز غيرك؟
– حمزة لبيض صوته قوى أوى وحلو جدا بصراحة.
■ شايفة إنه الأحق فعلًا إنه ياخد اللقب منك؟
– احنا الاتنين زى بعض، بس أنا لو أخدت أغنية بنفس مستوى أغانيه كنت ممكن أكسبه.
■ إنتى اخترتى تامر حسنى عشان بابا غششك ولا إنتى كنتى عايزاه؟
– أنا اتفاجئت أن التلاتة لفوا كراسيهم وكل واحد فيهم بيقولى انضم ليا، أنا ف الأول كنت هختار كاظم بس لقيت تامر أقنعنى إنى أبقى معاه وبعدين بابا بصلى من المسرح من فوق وقالى تامر، فحسيت إنه هو الاختيار الصح.
■ تفتكرى لو كنتى اخترتى كاظم كان فيه حاجة اتغيرت؟
– كاظم كان معاه أصوات كانت ممكن تنافسنى فى المراحل الأولانية وكنت ممكن أخرج من البرنامج، كنا هنبقى فريق كلنا أصواتنا شبه بعض وكانت هتبقى فعلا فرصتى إنى أفضل للنهائيات مش بنفس فرصتى مع تامر.
■ علاقتك كانت عاملة إزاى بنانسى؟
– كانت حلوة أوى.. غنتلى «يا بنات يا بنات».. وقرصتنى من خدودى وقالتلى أنا بحب الخدود واللى بيغنوا بخدود.
■ إيه السؤال المحرج اللى سألتيه لتامر؟
– رموشه كانت حلوة جدًا وتقيلة وسألته هو إنت مركب رموش؟ فضحك وقالى لا.
■ بعد ما سبتى البرنامج وجهى رسالة لكل واحد من أعضاء اللجنة.. نبدأ بنانسى؟
– كنت شيفاكى حلوة فى التليفزيون بس لما شفتك فى الحقيقة لقيتك أحلى بكتير ودمك خفيف وحنينة أوى.
■ رسالتك لكاظم؟
– متزعلش منى إنى مخترتكش.. فيه ناس كتير زعلوا منى عشان كده، بس إنت عارف إنى بحبك جدًا، بس كان لازم اختار مدرب واحد، وف كواليس البرنامج قالولنا اللى يقنعك تبقى معاه ليك حرية الاختيار إنك تنضمى لفريقه وأنا تامر قالى يرضيكى أزعل يعنى فاخترته.
■ رسالتك لتامر؟
– قضيت معاك أيام جميلة وحلوة عمرى ما هنساها.. ووحشتنى كلمة كابتن منك.
■ تقولى إيه للناس اللى صوتتلك؟
– أنا آسفة إنى مكسبتش.. أنا هأعمل كل اللى أقدر أعمله.. وهثبتلكوا الأيام الجاية إنى هطور من نفسى وأكون زى ما اتمنيتو تشوفونى.
■ والناس الغيرانين منك؟
– حاولوا تحبونى.
■ إنتى فى سنة كام ف المدرسة؟
– رابعة ابتدائى.
■ حاسة إيه اللى اتغير بعد البرنامج؟
– أول ما طلعت من مطار بيروت لقيت الناس بتشاور عليا وتتصور معايا، وفيه ناس كانت مخصمانى رجعت تكلمنى تانى.
■ هترجعى للمدرسة تتنكى على زمايلك بقى وكده؟
– لا خالص هبقى متواضعة لأن كلنا زمايل.
■ تفتكرى المدرسين هيحبوكى أكتر عشان بقيتى مشهورة؟
– هما أصلا بيحبونى من غير حاجة.. أنا بذاكر وبسمع الكلام وشاطرة.
■ سمعت إنك بتلعبى كاراتيه وعاملة فيها نينجا وكده؟
– آه بلعب كاراتيه ومعايا الحزام البنى ومستنية ٣ سنين كمان ويبقى معايا الأسود وأبقى كابتن.
■ مين اللى لو لاعبك يقعدك ف البيت؟
– «تضحك» لا محدش يقدر.
■ إيه وجه الشبه بين الكاراتيه والغنا؟
– الاتنين عكس بعض، الكاراتيه لعبة عنيفة والغنا حاجة مليانة إحساس، بس الاتنين محتاجين عشان ننجح فيهم القوة والعزيمة.
■ لو حد ف الكاراتيه ضايقك ممكن تضربيه تهزميه إنما ف الغنا لو صوته أحلى تعملى إيه؟
– أدرب على أغنية كويس أوى وأغنيها بإحساس عالى وتكون حلوة وتبين نقط القوة ف صوتى وأهزمه.
■ بتعرفى تطبخى إيه بقى؟
– بعمل شاى وسندوتشات جبنة بالطماطم، وبخدها معايا المدرسة.
■ إيه الأكلة اللى ماما بتعملها كل مرة وهى عارفة إنك مابتكلهاش؟
– «تضحك» القلقاس وكل مرة مبرضاش أكله برضه.
■ لو كنتى حيوان.. كان نفسك تبقى ايه؟
– «تكشر» الله يسامحك.
■ ممكن تربى حيوان إيه ف البيت؟
– نفسى فى زرافة بس ماما مش هترضى.
■ اسم الدلع اللى بتكرهيه؟
– كالالا.. وبابا بيقعد يضايقنى بيه.
■ بتخافى من مين أكتر بابا ولا ماما؟
– الاتنين.
■ بابا بيعاقبك إزاى؟
– بيحرمنى من المصروف.
■ وإنتى بتعاقبيه إزاى؟
– بخاصمه لحد ما يدهولى.
